صحيفة نبض الشعب الاسبوعيه رئيس التحرير جعفر الخابوري

#سبحان_الله ……..!!!!!
********************
خناقة حصلت لدرجة الطلاق ..بعدوا عن بعض ٣ أيام ..وحشوا بعض تاني ..فالمشكلة انتهت

هنا تدرك الإعجاز التشريعي ..لحكم الطلاق ف الإسلام

اللي كثير من المسلمين لا يعلموه
أن ف الإسلام ..علشان الزوج يطلق زوجته
مينفعش يطلقها ف حيض
طب يعمل ايه ؟..يستنى لما تطهر ..ثم يطلق إن شاء
ومينفعش يطلقها ف طهر جامعها فيه
طب يعمل ايه ؟ يستني حتى تحيض ثم تطهر ..ثم يطلق إن شاء

ولو طلق الزوج في الحيض مثلا جهلا منه
يأمره القاضي أن يراجع زوجته ..وينتظر حتى تطهر ثم تحيض ثم تطهر ..فيطلق بعد ذلك إن شاء
متخيل ..لو الزوج استنى الفترات دي أصلا ..هيطلق بعدها ؟!!
هما ساعتين زمن ..مع عصير ليمون ..الدنيا هتهدى خالص

مممم ..طب افرض المشكلة حصلت بين الزوجين ..ف طهر لما يجامعها فيه ..كدا عنده الفرصة أنه يطلق بدون ما ينتظر
لو حصل ..ففي حاجة اسمها فترة عدة ..٣ قروء = ٣ حيضات ..(غالبا بما يعادل ٣ شهور)

ف هذه المدة ..لا يزال الزواج قائم
على الرجل النفقة ع زوجته والسكنى كأن شيئا لم يحدث
وعلى المرأة أن تسكن ف بيت زوجها مش تغضب عند أهلها
ولا تخرج إلا بإذن زوجها كأن شيئا لم يحدث
ولو حد فيهم مات يرثه الآخر
كل شيء قائم كما هو ..إلا الأمور الزوجية الخاصة ..لأنها فترة عدة ..فترة انتقالية بين الزواج والطلاق

طب ليه كدا ؟ .. ليه متروحش بيت أهلها ؟
لأن زي ما ربنا قال ..لَعَلَّ اللَّهَ يُحْدِثُ بَعْدَ ذَلِكَ أَمْرًا
الراجل ضعيف ميقدرش يستحمل ..وجودهم مع بعض ..في بيت واحد ..كل هذه المدة ..يجعله يشتاق لزوجته مرة أخرى ..فيراجعها (وتتصلح المشكلة)

جهل الناس بالأحكام دي ودا الأغلب ..أو علمهم بها مع قلة الإيمان والتقوى والحرص على تنفيذ أوامر ربنا ..سبب ف خراب بيوت كتييير كان مآلها الاستقرار لو طبق الشرع
بتنفيذ الأحكام دي ..لن يطلق ولن يصبر ع الطلاق إلا من ضاقت عليه الأرض بما رحبت فعلا ..مش مجرد مشاكل هايفة بتحصل ف أي بيت ..يحصل بسببها الطلاق !

شوف حتى بعد دا كله
لو حصل طلاق وتم ..والعدة كمان خلصت ..وعدى سنين كمان
والزوجين حنوا لبعض تاني ..وحبوا يرجعوا لبعض 🥰
( وهو راضي ..وهي راضية )
مش من حق أبو المرأة أو ولي أمرها أن يمنعها
يرجعوا لبعض تاني حتى لو أبوها رافض
لو أبوها رفض ..تنتقل الولاية لغيره
جدها ثم ابنها ثم أخوها ...الخ
لو العيلة كلهم رافضين ..يزوجها القاضي ..عافية كدا
وترجع الأسرة تاني ..يعيشوا في سبات ونبات ويخلفوا صبيان وبنات
د. أيمن العوضي